Mbretëresha e sporteve, në Kosovë nuk ka “kurorë”

Gazmend Maxhuni mban rekordin e Kosovës në 100 metra vrapim. Maxhuni në Mitrovicë, gjashtë vite më parë kishte vrapuar këtë distancë për 11.06 sekonda. Ai është rekordmen i Kosovës në disiplinën më të shpejtë, por vetë ai mund të mos jetë edhe atleti më i shpejtë në Kosovë. 

Rekordin e tij mund ta kenë thyer disa herë studentët e Fakultetit të Shkencave Sportive gjatë provimit pranues. Madje, se ka pasur më të shpejtë se Maxhuni, është i sigurt prodekani i këtij fakulteti, Musa Selimi.

“Në bazë të raporteve dhe rezultateve të studentëve që marrin pjesë në provimet pranuese për t’u regjistruar në fakultetin tonë, kam hasur edhe në vrapime përfundi 11 sekondave në 100 metra vrapim. Po ashtu në 1000 metra jam shumë i sigurt që kam hasur në studentë që kanë përfunduar këtë distancë përfundi tre minutave. Ka studentë që janë marrë me futboll, volejboll e sporte të tjera”, ka thënë Selimi.

Atleti i klubit Rogana, Astrit Kryeziu, në vitin e fundit ka thyer plotë gjashtë rekorde të Kosovës në atletikë. Ai aktualisht është pronar i rekordeve të Kosovës në 200 metra, 400 metra, 600 metra, 800 metra, 1000 metra, 1500 metra vrapim. Në 200 metra rekordi i tij është 22.87 sekonda, që e arriti këtë vit në Mitrovicë. Por, kjo kohë është mjaft e “ngadalshme” krahasuar me atletët e nivelit botëror. Madje rekordi i tij është edhe më i ngadalshëm se koha më e mirë për 200 metra vrapim për femra këtë vit, të cilën e mban amerikania Allyson Felix (22.12 sekonda). Ndërkohë, në konkurrencën e meshkujve rekordin e botës (200 m) e mban xhamajkasi Usain Bolt me kohë 19.19 sekonda.

Stërvitja nëpër shtigje të improvizuara të fshatit

Trajneri i klubit më të suksesshëm të atletikës në Kosovë, Rogana, Zijadin Kryeziu, tregon se marrja me atletikë është mjaft e vështirë në Kosovë.

“Është shumë vështirësi e madhe për organizimin e garave në atletikë, pasi nuk posedojmë mjete të mjaftueshme, si financiare ashtu edhe në aspektin e infrastrukturës. Nuk kemi infrastrukturë të mirë për t’u stërvitur. Na duhet të improvizojmë ndonjë rreth për t’i bërë stërvitjet. Kushtet po na mungojnë, por ne nuk po ndalemi duke mbajtur gara e kampionate. Kemi garues të mirë të cilët mund të përballen me shumë garues të rajonit. Po t’i kishin kushtet ashtu siç i duhen një atleti për të stërvitur, atëherë nuk do të thyenim vetëm rekordet tona apo të Shqipërisë, por kemi atletë që mund të maten edhe me atletë të nivelit evropian. Atletët kosovarë duhet të kenë një qasje krejt ndryshe. Ata duhet të paguhen, të stimulohen, t’u mundësohet një infrastrukturë më e mirë. Ata duhet të përqendrohen vetëm në ushtrime. Duhet të stërviten nga tri orë në ditë intensivisht për të arritur në nivelin evropian. Duhet që edhe institucionet dhe komunat të rregullojnë shtigje të atletikës”, ka thënë Kryeziu.

Stadiumi i vetëm që ka shteg të atletikës për të garuar është ai “Adem Jashari” në Mitrovicë. Ky është vendi i vetëm ku mund të mbahen garat e atletikës në Kosovë.

Dallime edhe më të mëdha në përformancat e atletëve kosovarë me ata botërorë janë në disiplinat e tjera të atletikës, si hedhje e gjyles, të shtizës, diskut, kërcime në trehapësh e kërcime për së gjati.

Hasan Ganiaj me 13.86 metra mban rekordin e Kosovës në kërcim me tre hapa, por ky rekord është shumë i ulët në krahasim me normat ndërkombëtare. Rekordin e botës në trehapësh e mban britaniku Jonathan Edwards (18.29 metra). Ndërkohë rekordin në hedhje të gjyles e mban Arsim Miroci me 13.20 metra, por ky rekord është afro dhjetë metra më i vogël se ai i botës që e mban amerikani Randy Barnes (23.12 metra). Sejdi Blakaj mban rekordin e Kosovës në hedhje të diskut. Blakaj tash 54-vjeçar, hedhjen më të mirë të diskut në Kosovë e bëri gjashtë vite më parë në Mitrovicë (41.51 metra). Por, kjo hedhje është dukshëm më e vogël se rekordi i botës që mban gjermani Juergen Schult (74.08 metra), për gati 33 metra.

Vështirësitë e mëdha

Hiç më mirë nuk qëndrojnë punët as në konkurrencën e femrave. Burneta Rama mban rekordin e Kosovës në 100 metra (12.73 sekonda). Por, me këtë rekord ajo është shumë larg standardeve ndërkombëtare. Rekordi i botës në 100 metra ka firmën e amerikanes Florence Griffith Joyner (10.49 sekonda). Rama mban rekordet edhe në kërcim për së gjati (5.15 metra) dhe kërcim trehapësh (10.61 metra).

Kryetari i Federatës së Atletikës të Kosovës, Halil Sylejmani, pranon se në aspektin infrastrukturor është shumë e vështirë të organizohen garat e atletikës.

“Nuk jemi ndalur që pas pavarësimit. Ne kemi marrë ndihma nga të gjithë, por sa duhet nuk ka pasur asnjëherë. Federata e Atletikës së Kosovës është lënë gjithmonë anash nga institucionet e Kosovës. Por, ne kemi pasur njerëz entuziastë që nuk janë ndalur në asnjë çast. Ne krenohemi që organizojmë gjysmëmaratonën me sukses. Jam i kënaqur me arritjet e atletëve kosovarë. Deri diku në kualitet po u afrohemi shteteve të rajonit, por nuk duhet harruar sa larg nesh janë ata në infrastrukturë. Për atletët e Kosovës nuk ka kurrfarë kushte. Shtegu i vetëm është ai i Mitrovicës ku edhe shumica e garave mbahen. Nuk kemi kushte të mjaftueshme për atletët tanë”, ka thënë Sylejmani.

Gara më e njohur e atletikës që zhvillohet në Kosovë është gjysmëmaratona ndërkombëtare e Prishtinës. Sivjet është mbajtur për të 11-n herë, por ndryshe nga vitet e kaluara kur kishte shumë atletë nga vendet e huaja, sivjet kryesisht pati atletë kosovarë dhe shtetas të huaj, që punojnë në organizatat e huaja të pranishme në Kosovë.

Disa nga rekordet e meshkujve të Kosovës e të botës:

RK – Gazmend Maxhuni, 100m    11.06 sekonda

RB – Usain Bolt (Xhamajkë)    9.58 sekonda

RK – Astrit Kryeziu, 200m    22.87 sekonda

RB – Usain Bolt (Xhamajkë)     19.19 sekonda

RK – Astrit Kryeziu, 400m    48.67 sekonda

RB – Michael Johnson (SHBA)    43.18 sekonda

RK – Astrit Kryeziu, 800m    1:53.85 minuta

RB – David Rudisha (Keni)     1:41.01 minuta

RK – Astrit Kryeziu, 1.500m    3:57.54 minuta

RB – Hicham El Guerrouj (Marok)    3:26.00 minuta

RK – Meriton Hasanaj, 3.000m    8:41.68 minuta

RB – Daniel Komen (Keni)    7:20.67 minuta

RK – Rrahim Mani, 5.000m    15:19.80 minuta

RB – Kenenisa Bekele (Etiopi)    12:37.35 minuta

RK – Lulzim Kallaba, 10.000m    32:41.30 minuta

RB – Kenenisa Bekele (Etiopi)    26:17.53 minuta

RK – Bujar Tërshani, kërcim së gjati    6.89 metra

RB – Mike Powell (SHBA)    8.95 metra

RK – Hasan Ganiaj, kërcim trehapësh    13.86 metra

RB – Jonathan Edwards (Britani e M.)    18.29 metra

RK – Sejdi Blakaj, hedhje e diskut    41.51 metra

RB – Juergen Schult (Gjermani)    74.08 metra

RK – Arsim Miroci, hedhje e gjyles    13.20 metra

RB – Randy Barnes (SHBA)    23.12 metra

RK – Edzevit Mahmutoviq, hedhje e shtizës    52.85 metra

RB – Jan Zhelzny (Çeki)    98.48 metra

Disa nga rekordet e femrave:

RK – Burneta Rama, 100m    12.73 sekonda

RB – Florence G. Joyner (SHBA)    10.49 sekonda

RK – Arta Hasani, 200m    26.82 sekonda

RB – Florence G. Joyner (SHBA)    21.34 sekonda

RK – Arta Hasani, 400m    59.70 sekonda

RB – Marita Koch (Gjermani)    47.60 sekonda

RK – Gresa Bakraqi, 800m    2:15.58 minuta

RB – Jamila Kratochvilova (ish-Çek.)    1:53.28 minuta

RK – Gresa Bakraqi, 1.500m    4:35.22 minuta

RB – Qu Yunxia (Kinë)    3:50.46 minuta

RK – Diana Qehaja, 3.000m    10:41.48 minuta

RB – Wang Junxia (Kinë)    8:06.11 minuta

RK – Myrvete Përvetica, 5.000m    19:23.15 minuta

RB – Tirunesh Dibaba (Etiopi)    14:11.15 minuta

RK – Burneta Rama, kërcim së gjati    5.15 metra

RB – Galina Chistyakova (ish-BRSS)    7.52 metra

RK – Burneta Rama, kërcim trehapësh    10.61 metra

RB – Inessa Kravets (Ukrainë)    15.50 metra

RK – Ardita Uka, hedhje e gjyles    11.02 metra

RB – Natalya Lisovskaya (ish-BRSS)    22.63 metra

RK – Ardita Uka, hedhje e shtizës    38.30 metra

RB – Barbora Spotakova (Çeki)    72.28 metra

RK – Rina Blakaj, hedhje e diskut    38.52 metra

RB – Gabriele Reinsch (Gjermani)    76.80 metra

Lajme.Org » Sport

Leave a Comment

%d bloggers like this: