Përshkallëzohen tensionet Rusi-Gjeorgji

Titulli: Përshkallëzohen tensionet Rusi-Gjeorgji Sat Jul 12, 2008 3:07 pm

Përshkallëzohen tensionet Rusi-Gjeorgji
Tbilisi tërheq ambasadorin nga Moska. Erë lufte mes dy vendeve fqinje

Gjeorgjia ka tërhequr ambasadorin e saj nga Moska, pasi Rusia tha se kishte dërguar avionët e saj ushtarakë në hapësirën ajrore të fqinjit të saj, për të penguar një sulm të mundshëm mbi rajonet separatiste të Abkhazisë dhe Osetisë Jugore. Rusia pranoi fluturimin e avionëve të saj në qiejt gjeorgjianë pak orë pasi Sekretarja amerikane e Shtetit, Kondoleca Rajs, që gjendet në një vizitë në Gjeorgji, i kërkoi Moskës të ndihmojë në zbutjen e tensioneve në rajon, në vend që të kontribuojë për shtimin e tyre. Qeveria pro-perëndimore e Gjeorgjisë është përfshirë në një konfrontim me Rusinë në lidhje me dy rajonet separatiste të Gjeorgjisë, Osetisë Jugore dhe Abkhazisë, që refuzojnë sundimin e Tbilisit dhe marrin ndërkohë mbështetjen e Moskës. "Ne do të marrim disa hapa diplomatikë, në mënyrë që t‘u përgjigjemi në mënyrën e duhur veprimeve të Rusisë. Një hap i tillë është edhe ai i tërheqjes së ambasadorit tonë nga Rusia, për konsultime", tha ministrja e Jashtme gjeorgjiane, Ekaterine Tkeshelashvili. Sekretarja amerikane e Shtetit, Kondoleca Rajs, duke folur në kryeqytetin gjeorgjian, Tbilisi, pas takimit me Presidentin Mikhail Saakashvili, tha se "Rusia duhej të ishte pjesë e zgjidhjes së problemit... dhe jo të kontribuojë për përkeqësimin e tij". Ajo mbështeti ambicien e Gjeorgjisë për anëtarësim në NATO, por u kërkoi gjithashtu të gjitha palëve të ndalin dhunën që po përshkallëzohet në rajonet separatiste, ku të paktën gjashtë persona janë vrarë vetëm gjatë këtij muaji. Rusia ka akuzuar Gjeorgjinë se po orkestron dhunën, një akuzë që Tbilisi e mohon. "Dhuna duhet të ndalet nga çdo anë dhe unë ia kam thënë këtë edhe Presidentit", tha Rajs në konferencën për shtyp. Ndërkohë, pas deklaratave të sekretares Rajs, ka mbërritur edhe reagimi i Moskës. Rusia do të refuzojë çdo përpjekje të Shteteve të Bashkuara për të luajtur një rol më të madh në mosmarrëveshjen me Gjeorgjinë, citonte agjencia e lajmeve "Interfax" një diplomat rus. "Ne nuk shohim arsye që dikush tjetër të ndërhyjë në marrëdhëniet tona", thotë diplomati, duke shtuar se "ne kemi dialog direkt me Gjeorgjinë dhe kontaktet po vazhdojnë". Edhe diplomatët e Bashkimit Evropian kanë apeluar për qetësi në rajonet rebele, por thanë se BE-ja nuk dëshiron një përplasje me Moskën në lidhje me Gjeorgjinë, imazhi i së cilës është dëmtuar disi vitin e shkuar, kur Presidenti Sakashvili nxori nëpër rrugë policinë për të shpërndarë protestat e opozitës. Ministri i Jashtëm rus tha ndërkohë se forcat e tij ajrore ishin detyruar të vepronin, pasi kishin marrë informacione se forcat gjeorgjiane po përgatiteshin për një operacion ushtarak në Osetinë Jugore. Ai tha: "Pas të dhënave të mbledhura, vendosëm të ndërmerrnim këtë hap që në të njëjtën kohë na lejoi edhe të ‘freskonim‘ kokat e nxehta në Tbilisi dhe të parandalonim zhvillimet e mëtejshme në linjat ushtarake". Kjo ishte e para herë në një dekadë që Rusia pranon se forcat e saj ajrore kanë fluturuar mbi territorin gjeorgjian pa leje. Kur Gjeorgjia është ankuar në të shkuarën për shkelje të ngjashme, Moska gjithnjë e ka mohuar këtë fakt. Kanali televiziv rus, "Rossija", citonte një gjeneral-kolonel, Sergei Makarov, komandant i garnizonit ushtarak në Kaukazin verior, që thoshte se trupat ruse mund të vendosen në rajonet separatiste për t‘u ardhur në ndihmë paqeruajtësve që janë të vendosur atje. Rusia zyrtarisht nuk njeh asnjë prej qeverive të rajoneve separatiste, por mban kontakte të ngushta me to dhe i ka dhënë pasaporta ruse një numri të madh banorësh të tyre. Forcat paqeruajtëse ruse janë vendosur në të dyja rajonet dhe Gjeorgjia e akuzon Moskën se po mbështet separatistët. Sipas Gjeorgjisë, Rusia po përdor trupat paqeruajtëse si një koperturë për dërgimin e artilerisë dhe armëve të tjera të rënda në Abkhazi dhe se ka dërguar avionët e zbulimit pa pilotë mbi këto rajone. Në fillim të këtij viti Moska vendosi lidhje gjysmë-zyrtare me administratat separatiste në Osetinë Jugore dhe Abkhazi.
_________________