Prifti, anëtar i bandës së krimit

Titulli: Prifti, anëtar i bandës së krimit Sun Jul 20, 2008 12:12 pm

Prifti, anëtar i bandës së krimit
Në pranga edhe tre policë të Kapshticës. Hetimet shtrihen në Greqi

Mjekra e gjatë dhe rroba e zezë nuk tregojnë domosdoshmërisht një njeri që jeton sipas parimeve të Ungjillit të Shenjtë. Prokurorët e Fierit dhe ekspertët e policisë u bindën për këtë dje, kur vunë në pranga për dy vepra penale priftin e fshatit Karavasta të Lushnjës.

Mikail Shuli, 45 vjeç, është shoqëruar për në polici e më pas arrestuar në akuzën e "korrupsionit pasiv" dhe "dhënies së ndihmës për kalim të paligjshëm të kufirit". Lajmi bëhet i ditur nga nëndrejtori i Policisë së Qarkut të Fierit, Artan Cuku, i cili në një prononcim për gazetën "Shqip" ka pohuar se "operacioni për arrestimin e Mikail Shulit është drejtuar nga zyra e luftës kundër korrupsionit në Drejtorinë e Përgjithshme të Policisë, mbështetur edhe nga policia e Fierit".

Sipas nëndrejtorit, Artan Cuku mësohet se mëngjesin e së shtunës nga Drejtoria e Përgjithshme e policisë është kërkuar që të shoqërohet e të pyetet prifti ortodoks, Mikail Shuli. Uniformat e policisë së Lushnjës, si dhe agjentë të zyrës së trafikut të qenieve njerëzore në Drejtorinë e Policisë së Fierit i janë drejtuar fshatit Karavasta të Komunës Rremas në rrethin e Lushnjës ku dhe kanë bërë të mundur prangosjen e 45-vjeçarit.

Ky i fundit nuk ka bërë rezistencë, ndërkohë që mësohet të ketë thënë për uniformat blu se gjithçka është një keqkuptim, pasi ai është një njeri i perëndisë. Por pasi është mbajtur për pak orë në mjediset e Komisariatit të Policisë së Lushnjës si i shoqëruar, Mikail Shuli është dërguar në pranga për në Tiranë, ku sipas policisë, së bashku me bashkëpunëtorët e tjerë të arrestuar ai do të hetohet.

Burimet zyrtare nga Komisariati i Lushnjës bëjnë të ditur për gazetën "Shqip" se po hetohet edhe për vepra penale të tjera, të cilat dyshohen se janë kryer nga prifti i Rremasit.

Sipas burimeve nga policia e Lushnjës, e cila është përfshirë në operacionin e plotësimit të dosjes me dëshmi e fakte, mësohet se prifti nën pozicionin që gëzonte, arrinte të siguronte persona, të cilët donin të kalonin kufirin në mënyrë të paligjshme.

Më pas, prifti i drejtonte klientët e tij te grupi kriminal ku dhe bënte pjesë për të marrë kundrejt këtij shërbimi një pjesë të parave që paguheshin për kalimin e kufirit.

Burimet policore të Lushnjës tregojnë për "Shqip" se prifti kishte gjetur edhe banorë nga zona e tij për të dërguar në emigrim. Veçanërisht ai gjurmonte adoleshentët, të cilët rridhnin nga familje të varfra.

"Po sigurohen dëshmitë e familjarëve të larguar pas ndihmës që kanë marrë nga prifti", thanë për "Shqip" burimet policore. Policia bën të ditur se pozicioni i priftit i ka dhënë mundësi Shulit që t‘i siguronte me lehtë klientët. Konfirmohet se ka pasur shumë persona nga zona e Rremasit, Divjakës e Lushnjës, të cilët kanë emigruar ilegalisht në Greqi me ndihmën e priftit. Ndërkohë, policia deklaron se falë pozicionit që mbante, prifti i Rremasit, Mikail Shuli, arrinte t‘i kalonte këta të rinj matanë kufirit sikur ata të ishin punonjës të kishës.

Portreti

At Mikaili, njeri i respektuar nga fshatarët dhe kolegët

At Mikail Shuli është emëruar prift në kishën ortodokse të fshatit Rremas qysh nga viti 1998. Pas përfundimit të shkollës tetëveçare në fshatin Karavasta, Shuli vijon arsimin e mesëm në rrethin e Lushnjës dhe në vitet 1990 vazhdon shkollën për teologji në Durrës. Emërimi i tij është bërë nga peshkopata e Beratit dhe nga kryepeshkopata në Tiranë. Banorët e fshatit Karavasta ku ai shërbente, asnjëherë nuk kanë pasur ankesa për kreun e kishës së tyre. Në fshat, prifti njihej si njeri me karakter dhe gëzonte respekt. Edhe priftërinjtë e tjerë të rrethit të Lushnjës dhe të Fierit janë shprehur mjaft të befasuar nga arrestimi i kolegut të tyre. Ata kanë thënë se "nëse arrestimi i priftit nga policia ka qenë për shkak të një keqkuptimi, atëherë do të ketë mjaft reagime nga Kisha Ortodokse shqiptare". Ky reagim në mbështetje të priftit të arrestuar ka ardhur me anën e një komunikate për mediat që është firmosur nga një numër i madh priftërinjsh kryesisht nga rrethi i Lushnjës.

Hetimet

Tre punonjësit me uniformë të Kapshticës akuzohen se siguronin lehtësi për grupin kriminal

Policët koordinonin turnet për ta pasur "Korridorin e lirë"

Operacioni "Korridori i lirë" ka goditur rëndë stafin e policisë së kufirit në Kapshticë. Tre punonjës të policisë kufitare që kryenin shërbime në tre turne të ndryshme në këtë pikë të kalimit kufitar janë arrestuar dje të akuzuar si të përfshirë në një rrjet trafikantësh që funksiononte si linjë e paligjshme në zonën e Korçës dhe Devollit. Policët e arrestuar janë Ismet Rroqi, me detyrë përgjegjës turni dhe kontrollorët Sefer Çollaku dhe Rajmond Duro. Tre punonjësit e policisë janë vënë në pranga gjatë operacionit të Drejtorisë së Përgjithshme të Policisë, sektorit të krimeve të organizuara dhe strukturave të SHKB-së, ndërsa në dispozicion të shkatërrimit të këtij rrjeti, që sipas të dhënave funksiononte si grup kriminal, janë vënë edhe mjetet dhe forca të policisë rajonale. Burime të mirinformuara pranë policisë së Korçës kanë bërë të ditur se të tre punonjësit e policisë, kryenin shërbime në turne të ndryshme duke qenë gjatë 24 orëve në kufi në të tri turnet, për të favorizuar kalimet e paligjshme mes të cilave edhe të personave me dokumente të falsifikuara që fabrikoheshin në Korçë. Gjatë këtij operacioni të koduar "Korridori i lirë", janë arrestuar edhe 10 persona civilë, mes të cilëve një prift nga Lushnja, të cilët dyshohet se janë pjesë e një rrjeti që merrej me kalimin e klandestinëve, ndërsa policët shërbenin për favorizimin e të gjitha lëvizjeve duke marrë përsipër dhe siguruar edhe kalimin e shtetasve që jepnin para për të ikur në drejtim të shtetit grek. Grupi kriminal ka pasur në përbërje të tij transportues grumbullues të klandestinëve, policë, falsifikatorë, udhërrëfyes etj. Sipas të dhënave nga burimet konfidenciale kanë qenë dy shtetas nga Korça që bënin edhe falsifikimin e dokumenteve, të tjerët ishin të angazhuar si shoferë dhe udhërrëfyes ose pilotë, dy shtetas nga Fieri dhe Lushnja siguronin grumbullimin dhe gjetjen e klientëve, ndërsa policët e kufirit favorizonin trafikun në kufi kundrejt një pagese. Për këtë të fundit, ndaj tyre është ngritur akuza e korrupsionit pasiv, ndërsa për shkak të implikimit në rrjet ndaj tre punonjësve të policisë kufitare ka edhe dy akuza të tjera të rënda për favorizim të trafiqeve dhe për shpërdorim të detyrës. Agjentë të Drejtorisë së Krimeve të Rënda kanë vepruar në fshehtësi për të arrestuar në flagrancë gjatë natës tre punonjësit e policisë, si dhe 6 shtetas të tjerë nga Korça dhe katër nga rrethet e tjera të vendit që kishin ngritur këtë skemë të funksionimit të kalimit të klandestinëve për në Greqi kundrejt fitimit monetar, që varionte nga 1000-4000 euro për çdo shtetas të interesuar për të kaluar në mënyrë ilegale përtej kufirit.

Dhjetë persona janë arrestuar gjatë një operacioni të realizuar nga tre sektorë të policisë, pasi akuzohen për trafik klandestinësh. Mes të arrestuarve janë edhe tre policë, të cilët shërbenin në pikën e kalimit kufitar të Kapshticës. Gjithashtu, policia tha se bashkë me këta persona ndodhet i arrestuar edhe një prift. Të arrestuarit dyshohen se në formën e grupit kriminal kanë kaluar me dhjetëra klandestinë drejt Greqisë, e më pas edhe drejt Italisë. Burimet zyrtare të Policisë së Shtetit bënë të ditur se dje, rreth orës 13.00, Shërbimi i Kontrollit të Brendshëm në Ministrinë e Brendshme, në bashkëpunim me Drejtorinë Kundër Krimit Financiar në Drejtorinë e Përgjithshme të Policisë së Shtetit dhe në bashkëpunim me Drejtoritë e Policisë të Qarqeve Tiranë, Korçë, Fier dhe Vlorë, përfunduan me sukses operacionin e koduar "Korridor i lirë", për kapjen dhe arrestimin e dhjetë personave. Veç policëve, burimet nga grupi hetimor thanë se ndalimi i shtatë personave të tjerë u bë mbi bazën e urdhrave të ndalimit të Prokurorisë Task-Forcë për veprat penale të "korrupsionit pasiv nga punonjës që ushtrojnë funksione publike", "dhënie ndihmë për kalim të paligjshëm të kufirit me qëllim përfitimi", "falsifikim i pasaportave, vizave formularëve", "falsifikim i vulave, i stampave, ose formularëve" dhe "prodhim i mjeteve për falsifikim dokumentesh". Më tej, policia sqaroi se gjithashtu është bërë edhe ndalimi i tre punonjësve të policisë në pikën e kalimit kufitar në Kapshticë dhe konkretisht në pranga kanë përfunduar Ismet Rroqi, 29 vjeç, me detyrë përgjegjës turni në pikën e kalimit kufitar Kapshticë, Sefer Çollaku, 50 vjeç, me detyrë kontrollor në pikën e kalimit kufitar Kapshticë dhe Rajmondi Duro, 40 vjeç, me detyrë kontrollor në pikën e kalimit kufitar Kapshticë. Nga hetimet disamujore, nën drejtimin e Prokurorisë Task-Forcë të Krimit Financiar dhe Korrupsionit, duke përdorur metodat speciale të hetimit, ka rezultuar se ky grup funksiononte për një periudhë të gjatë kohe si një rrjet i mirorganizuar për kalimet e shtetasve shqiptarë nga Shqipëria në Greqi dhe më pas në Itali. Aktualisht, është bërë i mundur dokumentimi i veprimtarisë kriminale, që këta persona, në bashkëpunim me njëri-tjetrin dhe me punonjës të policisë të pikës së kontrollit të kalimit kufitar në Kapshticë, realizonin kalimin në mënyrë të paligjshme të shtetasve të ndryshëm nga territori i Republikës së Shqipërisë për në territorin grek, ku përfitimet nga ky aktivitet shkonin deri në 2 mijë euro për çdo person. Gjatë kryerjes së këtij aktiviteti, personat e arrestuar falsifikonin dokumente të ndryshme, si pasaporta, viza, certifikata, leje qëndrimi e çdo lloj dokumenti tjetër që u nevojiteshin. Gjatë kontrollit të banesave të personave të mësipërm, u gjetën dokumente shkresore, që vërtetojnë plotësisht aktivitetin e tyre kriminal, si pasaporta, kompjuterë, certifikata personale dhe familjare në emër të personave të ndryshëm, fotografi e dokumente të tjera të falsifikuara. Gjithashtu, janë sekuestruar 6 automjete që përdoreshin nga këta persona për kontrabandimin e shtetasve të ndryshëm jashtë territorit shqiptar, 20 pasaporta, 12 celularë etj. Vazhdon hetimi për zbardhjen e plotë të këtij trafiku.

Hetimi

Policia dyshon se në këtë rrjet

janë përfshirë edhe policë grekë

Nga hetimet e policisë shqiptare për grupin që merrej me trafikimin e klandestinëve ka rezultuar se në këtë aktivitet kriminal janë përfshirë edhe punonjës të policisë greke. Sipas të dhënave hetimore, dyshohet se rrjeti i shqiptarëve paguante para edhe te punonjësit e policisë greke për të kaluar klandestinët, të cilët më vonë transportoheshin drejt Italisë. Ky trafik kryhej në turne të veçanta, kur punonjësit e policisë, tashmë të arrestuar, kishin shërbimin e tyre. Ndërkaq, policia ka treguar se gjatë operacionit janë shoqëruar disa persona të tjerë, të cilët më pas janë lënë sërish të lirë. Veç kësaj, policia shqiptare ka përgatitur një kërkesë bashkëpunimi, që ia ka drejtuar policisë greke, në lidhje me zbulimin e gjithë personave të përfshirë në këtë rrjet kriminal. Policia tha se brenda një kohe të shkurtër kjo shkresë do i dërgohet palës greke, ku priten edhe arrestime të tjera. Fillimisht, policia i nisi hetimet për këtë grup nga deponimet e mbledhura prej emigrantëve të arrestuar në Greqi dhe Itali.

Të arrestuarit

Ismet Rroqi, 29 vjeç, me detyrë përgjegjës turni në pikën e kalimit kufitar Kapshticë

Sefer Çollaku, 50 vjeç, me detyrë kontrollor në pikën e kalimit kufitar Kapshticë

Rajmondi Duro, 40 vjeç, me detyrë kontrollor në pikën e kalimit kufitar Kapshticë

Leonard Belortaja, 32 vjeç, lindur dhe banues në Korçë, me arsim të mesëm, me punë shofer

Artur Likollari, 42 vjeç, lindur dhe banues në Korçë, me arsim të mesëm, me punë shofer

Altin Qatipi, 30 vjeç, lindur dhe banues në Tiranë, me arsim 8-vjeçar, me punë shofer

Edmond Tollkuçi, 35 vjeç, lindur dhe banues në Korçë, me arsim 8- vjeçar

Manol Xhamia, 48 vjeç, lindur dhe banues në Bilisht, me arsim 8- vjeçar, me punë shofer

Ilir Çipi, 38 vjeç, lindur dhe banues në Korçë, me arsim të mesëm, me punë në sektorin privat

Mihal Shuli, 47 vjeç, lindur dhe banues në Lushnjë, me arsim të lartë, prifti i fshatit në Karavasta
_________________

Titulli: Re: Prifti, anëtar i bandës së krimit Mon Aug 11, 2008 8:05 pm

booooooooobohhhhhhhh
e kishte mir enver hoxha me priftat,,,,,, affraid