Nga vij e ku shkoj?

Titulli: Nga vij e ku shkoj? Thu Dec 06, 2007 3:08 pm

Seriozisht nuk e di. Nganjëherë si çdo njeri i këtij vendi, jam në dilemën e madhe: Çfarë jemi me të vërtetë ne shqiptarët? Një rracë e përzier kulturash, fesh, identitetesh, egosh, të cilët i bashkon mirë apo keq një gjuhë? Gjithçka mund të na bashkojë por historia jo! Huntigtoni, po të na kishte studiuar hollë hollë do të çuditej se s`do gjente ndarjen fetare mes shqiptarëve, por do gjente një ndarje tjetër të pakuptueshme që i ka bërë lëmsh njerëzit që nga Ismail Beu e deri më sot…ndarjen radikale politike!

Shqiptarët janë të ndarë, të përçarë, të përçmuar nga njëri tjetri…I pari s`e do të dytin, i dyti të parin e sëbashku s`duan të tjerët!

E pse ndodh kjo? Sepse ata vetëm kanë mësuar të zhvlerësojnë e jo të vlerësojnë në historinë e tyre. Nuk i besoj tregimit (deri në legjendë) të gjyshes sime 95 vjeçare që duke thurrur çorape më thotë: “Jemi popull i mallkuar, na ka mallkuar Sulltan Mahmudi. Doli një ditë në një fushë në Shqipëri dhe dëgjoi shqiptarët që bërtisnin…Ç`keni - u tha? Duam të bëhemi hyrr (të lirë) thanë ata! Hyrr doni - tha ai – horr o bëfshi!”

Shqiptarët kanë patur një fuqi gjigande në duart e tyre në Perandorinë Osmane. E në fakt e zhvlerësuan dhe e shumëzuan me zero të gjithë atë eksperiencë, kulturë e maturi shtetformuese të cilën vetë Turqia e ka trashëguar më së miri. Madje e fshinë edhe kujtesën fare, duke e cilësuar një periudhë të errët në histori, një kohë kur ata kontribuan në qeverisjen e një prej shteteve më të mëdhenj të historisë. Të dytët gjithmonë zhvlerësojnë të parët e kjo ka ndodhur sistematikisht deri në ditët e sotme! Të gjithë e nisin ta ndërtojnë nga zeroja, duke e lënë praktikisht në zero këtë vend!

Gjithësesi, historia e trishtë 95 vjeçare e një shteti minor si Shqipëria vërteton Talat Pashën ( ish funksionar i Perandorisë, ish ministër i brendshëm në kohën e Ataturkut) që i thotë Eqerem bej Vlorës: “Eqerem bej, ndoshta një ditë do ta bëni Shqipërinë tuaj. Por mos harroni se do hani njëri tjetrin në atë vendin tuaj të vogël, pasi ju jeni mësuar të qeverisni në lëndinat e gjera të Perandorisë Osmane…”!

Për ata që e ndjekin dhe e ndjejnë politikën, është i thjeshtë zbërthimi i këtyre fjalëve. Pra shqiptarët s`kanë punë tjetër veç të debatojnë pa zgjidhur gjë, dhe mbi të gjitha pa e respektuar njëri tjetrin kur vjen puna te historia. Gjithësecili në tel të vet i bie çiftelisë e bën iso për qejf të vet, e në thelb ne mbetemi veç një gjullurdihane. Ne s`njohim baza shkencore, argumente historike, analizë të ftohtë dhe ato që kanë qenë i kemi zhdukur dhe transformuar. Personalisht unë mësova shumë nga Top Story i fundit i Sokol Ballës në Top Channel, gjëra që shkolla me histori të deformuar s`mi kishtë mësuar e që filmat me skenare të “përpunuar” m`i kanë keq-mësuar! (Mirë Skënderbeun se na e bënë rusët, po me Nëntorin e Dytë ç`patën xhanëm)?

Më kujtohet një kolege në punë që po argumentonim fjalën Irakian apo Iraken. I thashë se në fjalor është irakian dhe ne në lajme s`mund ta themi iraken meqë kështu e thonë italianët! “E kanë gabim ata në fjalorin e Gjuhës Shqipe” – më tha! Atëherë ku do bazohemi kur vlerësojmë e çvlerësojmë sipas mendjes dhe midesë?

Më thoni miq, ku do bazohemi për historinë apo për gjuhën? Ku do bazohemi për vlerat që po i vrasim përditë me telenovela bastarde të sjella për pesë pare nga Brazili? Ku do bazohemi për bashkimin ndërkohë që ka shqiptarë (fatkeqë do t`i quaja) që s`i duan kosovarët e çamët, pasi ka ende monstra që mbjellin përçarje mes krahinave e njerëzve?

Ku do bazohemi për politikën që më shumë ndan se bashkon? Ku do bashkohemi me gruan në shtëpi me të cilën më parë divorcohemi se martohemi?(Shikoni statistikat e gjykatave)! Ku do bashkohemi me fëmijët tanë, më gjakun tonë që e përdhunojmë në mënyrë maniake-dreqnore? Ku do bashkohemi me 80 përqind më shumë kërkesa për azil pleqsh këtë vit? Ku do bashkohemi me një administratë të cilën do ta gjesh te Kullat, të Piaca, të Manhatan, te Valle Verde te ku di unë se cili lokal e kurrë në punë?

Na bashkon vetëm interesi për të fundosur njëri tjetrin, ndërsa notojmë në llumin e paaftësisë! Deri kur? Dhe gjithçka nis nga fillimi e ne debatojmë për një histori që s`është histori, për heronj që kanë qenë tradhëtarë e tradhëtarë që kanë qenë heronj! E ç`më duhet mua se ç`tha Mehmeti, Enveri, Kadriu dreqi dhe i biri në filan plenium, kur unë s`e di ç`ti them vajzës time nesër - që tjetër do ja thotë gjyshi, tjetër unë, tjetër daja, tjetër mësuesja e tjetër televizori? Ndaj jam në dilemën e madhe të prejardhjes dhe vijimësisë!

01/12/2007

Gazeta start